Grupos

O noso é un espazo amplo, pero o equipo é pequeno: somos dous.

Por iso, para nós, máis de seis persoas xa é un grupo e precisamos traballar cun menú previamente acordado.

É unha limitación, si. Pero tamén unha oportunidade.

A oportunidade de facer algo máis á medida. De pensar o menú para o voso grupo. E, sobre todo, de chegar, sentar e non ter que pensar en que tomar: iso xa está decidido. Só queda desfrutar da comida, do lugar e da xente coa que viñestes.

Para comezar a preparalo, necesitamos que no formulario nos contedes un pouco sobre o voso grupo: cantos sodes, que buscades, se hai algunha necesidade alimentaria ou algo que debamos ter en conta…

Con esa información, nós prepararémosvos varias propostas de menú. Se vos encaixan, seguimos adiante e poñémonos a traballar para que todo estea listo cando chegue o día.

De luns a venres

Para abrir ao mediodía para un grupo necesitamos un mínimo de 8 persoas e, sobre todo, tempo suficiente para poder preparar as propostas, que as escollades e nós organizar todo.

Se sodes 14 ou máis, durante a semana tedes ademais a posibilidade de facer a comida a porta pechada: o espazo só para vós.

Se sodes menos e vos apetece esa opción, tamén podemos falalo. Aquí hai cousas que se poden negociar. 😉

E as fins de semana?

Tamén por aquí.

Os grupos de fin de semana, de máis de seis persoas, xestiónanse igualmente a través deste formulario. A única diferenza é que facer unha comida a porta pechada é bastante máis complicado.

Pero o importante mantense: o menú tamén se pensa para vós.

E os menús?

Sempre temos varias opcións, incluída algunha proposta de menú vegano.

O funcionamento é sinxelo: o grupo escolle un único menú para todos. A partir de aí, podemos facer cambios e axustes para adaptalo ao grupo e tentar atopar ese menú que vos encaixe.

E hai algo máis.

Agora que o verán está a piques de rematar, pronto volverá un dos nosos menús máis especiais:

o Cocido de Porco Celta.

Un menú degustación completo, pensado para desfrutar sen présas e descubrir o porco celta

Unha desas propostas que, se sodes un grupo, ten aínda máis sentido compartir.

Imos alá?

Agora cóntanos ti